Бугун ЎФА қошида Тиббий қўмитасининг навбатдаги йиғилишида ЎФА раҳбарияти, қўмита аъзолари, ҳудудий академиялар шифокорлари ҳамда масъуллар иштирок этишди. Йиғилиш кун тартибига кўра, академияларнинг биринчи ярим йилликдаги тиббий йўналиши бўйича фаолияти таҳлил қилинди. Йиғилишда иштирок этган ЎФА биринчи вице-президенти Равшан Ирматов футбол тиббиётини тизимли ривожлантириш борасидаги талаб ва таклифларини билдирди.
«Сизлар футболимиз ривожланишида муҳим вазифани бажарасиз. Ёш футболчиларимизни соғлом вояга етказишда спорт шифокорларининг ўрни беқиёс. Шу сабабли, тиббиёт соҳасини янада ривожлантиришда олдинга қадам ташлаяпмиз, бироқ олдимизда ҳали анча вазифалар бор. Тан олиш керак, ўз вақтида витаминизация, тўғри овқатланиш борасидаги камчиликлар сабаб ҳозирда кўплаб футболчиларимизда бўй ва жисмоний куч жиҳатдан бироз камчиликлар кузатилмоқда. Биз бу ҳолатни кечиктирмай ҳозирданоқ тубдан ислоҳ қилишга сизлар билан бирга киришдик. Ишончимиз комилки, ушбу бошлаган ишларимиз яқин келажакда ўз натижасини беради», деди Равшан Ирматов.
Учрашув давомида академия тарбияланувчиларининг соғлиғини доимий мониторинг қилиш, уларнинг тўғри овқатланиши, витаминизация ва тикланиш жараёнларига илмий ёндашиш кераклиги таъкидланди. Барча академияларни зарур тиббий ускуналар, дори-дармонлар, витаминлар билан таъминлаш, мавжуд камчиликларни бартараф этиш бўйича тегишли кўрсатмалар берилди. Бундан ташқари, ёш кадрларни малакасини доимий ошириб бориш зарурлиги айтилди. Иштирокчилар кун тартибидаги масалалар юзасидан ўз таклифларини билдирдилар.