Bugun O‘FA qoshida Tibbiy qo‘mitasining navbatdagi yig‘ilishida O‘FA rahbariyati, qo‘mita a’zolari, hududiy akademiyalar shifokorlari hamda mas’ullar ishtirok etishdi. Yig‘ilish kun tartibiga ko‘ra, akademiyalarning birinchi yarim yillikdagi tibbiy yo‘nalishi bo‘yicha faoliyati tahlil qilindi. Yig‘ilishda ishtirok etgan O‘FA birinchi vise-prezidenti Ravshan Irmatov futbol tibbiyotini tizimli rivojlantirish borasidagi talab va takliflarini bildirdi.

«Sizlar futbolimiz rivojlanishida muhim vazifani bajarasiz. Yosh futbolchilarimizni sog‘lom voyaga yetkazishda sport shifokorlarining o‘rni beqiyos. Shu sababli, tibbiyot sohasini yanada rivojlantirishda oldinga qadam tashlayapmiz, biroq oldimizda hali ancha vazifalar bor. Tan olish kerak, o‘z vaqtida vitaminizasiya, to‘g‘ri ovqatlanish borasidagi kamchiliklar sabab hozirda ko‘plab futbolchilarimizda bo‘y va jismoniy kuch jihatdan biroz kamchiliklar kuzatilmoqda. Biz bu holatni kechiktirmay hozirdanoq tubdan isloh qilishga sizlar bilan birga kirishdik. Ishonchimiz komilki, ushbu boshlagan ishlarimiz yaqin kelajakda o‘z natijasini beradi», dedi Ravshan Irmatov.

Uchrashuv davomida akademiya tarbiyalanuvchilarining sog‘lig‘ini doimiy monitoring qilish, ularning to‘g‘ri ovqatlanishi, vitaminizasiya va tiklanish jarayonlariga ilmiy yondashish kerakligi ta’kidlandi. Barcha akademiyalarni zarur tibbiy uskunalar, dori-darmonlar, vitaminlar bilan ta’minlash, mavjud kamchiliklarni bartaraf etish bo‘yicha tegishli ko‘rsatmalar berildi. Bundan tashqari, yosh kadrlarni malakasini doimiy oshirib borish zarurligi aytildi. Ishtirokchilar kun tartibidagi masalalar yuzasidan o‘z takliflarini bildirdilar.