"Валенсия" ярим ҳимояси етакчиларидан бири Карлос Солер "ПСЖ"га трансферни якунлаш учун Парижга учиб кетди. Бу ҳақда инсайдер Фабрицио Романо ўзининг ижтимоий тармоқлари орқали маълум қилди.
Манба берган хабарга кўра, испаниялик ярим ҳимоячи бугун, 1 сентябрь куни Париж грандига янги келган футболчи сифатида таништирилади. Битим 18 миллион еврони ташкил қилади, яна уч миллион “кўршапалаклар” бонус тўлов сифатида олади. 25 ёшли ярим ҳимоячи билан 2027 йилнинг ёзига қадар узоқ муддатли шартнома имзоланади.
2021/2022 йилги мавсумда Карлос “Валенсия” сафида 38 та ўйинда қатнашиб, 12 та гол ва 5 та голли узатмага муаллифлик қилган.
