Португалиялик Педру Алмейданинг сўзларига кўра, Криштиану Роналду "Манчестер Юнайтед" билан шартномасини бекор қилмоқчи.
Манбанинг хабарига кўра, 37 ёшли футболчининг бу қарорга келиши эҳтимоли ортиб бормоқда.
Олдинроқ клуб матбуот хизмати "Манчестер Юнайтед" ҳужумчиси "Челси"га қарши АПЛ 13-тур учрашувида иштирок этмаслиги ҳақида хабар берганди. Бундан ташқари, The Athletic хабарига кўра, бош мураббий Эрик тен Хаг португалияликни асосий жамоа билан машғулотлардан четлаштириши, футболчи эса индивидуал тарзда ишлаши керак бўлиши кутилмоқда.
Эслатиб ўтамиз, Роналду 19 октябрь куни бўлиб ўтган АПЛ 12-туридан ўрин олган "Тоттенхэм"га (2:0) қарши ўйиннинг 90-дақиқасида ўйин якунига етмасдан захира ўриндиғини тарк этиб, кийиниш хонасига йўл олган эди.
Жорий мавсумда португалиялик футболчи “Манчестер Юнайтед” сафида АПЛда 8та ўйин ўтказиб, битта гол урган.
