Ёш иқтидор эгаларини тарбиялаб, шу орқали ўзбек футболи ривожига ҳисса қўшишни мақсад қилган Тошкент шаҳар футбол академияси (ТФА) "Локомотив" ПФК тасарруфига ўтди.
Бугун ТФА раҳбари Искандар Анаркулов клубимиз офисига ташриф буюриб, "Локомотив" ПФК бош директор ўринбосари Тўлабек Акрамов билан учрашди ва мазкур учрашув самараси ўлароқ ҳар икки томон ўртасида меморандум имзоланди.
"Бу нима дегани? Эндиликда Тошкент шаҳар футбол академиясидан етишиб чиқадиган ёшлар биринчи навбатда "Локомотив" кўригида бўлиб, энг иқтидорлилар "темирйўлчилар" сафига қабул қилинади. Бу орқали ёш футболчилар "Локомотив" футбол клубида фаолиятни давом эттириш имконига эга бўлишади.
Ўзбекистон Республикаси Президенти Ш.Мирзиёевнинг 04.12.2019 йилдаги ПФ-5887-сонли "Ўзбекистонда футболни ривожлантиришни мутлақо янги босқичга олиб чиқиш чора-тадбирлари тўғрисида"ги Фармонига кўра, футбол академияларнинг замонавий усулда иш олиб бориши ҳамда профессионал футбол клублари билан ҳамкорликни йўлга қўйиши алоҳида белгилаб қўйилган.
Шуни инобатга олган ҳолда Тошкент шаҳар футбол академиясининг "Локомотив" ПФК тасарруфига ўтганини ҳар икки томон учун фойдали танлов деса бўлади. Ўзбек футболида "Локомотив" клубининг ўз ўрни борлигини эътиборга олсак, жуда кўпчилик ёшлар айнан шу жамоа сафида тўп тепишни хоҳлайди. Томонлар ўртасида тузилган меморандум эса ёшларнинг кейинчалик катта клубда фаолият олиб боришига имкон беради.
Эслатиб ўтамиз, бугунги кунда "Локомотив" ПФКга қарашли "Локомотив" болалар ва ўсмирлар мактаби билан бир қаторда пойтахтимизнинг Чилонзор" туманида "Локомотив Kids", Сергели туманида "Локомотив Smart" филиаллари ҳам фаолият юритмоқда. Биргина "Локомотив" футбол мактабининг ўзида 600 нафарга яқин болалар ва ўсмирлар футбол сир-асрорларини ўрганмоқда.
"Локомотив" ПФК шунингдек, иқтидорларга бой Одил Аҳмедов футбол академияси билан ҳам ўзаро ҳамкорликни йўлга қўйган. Яна бир янгилик шуки, жорий йил якунига қадар Яшнобод туманида жойлашган ТАПОиЧ стадиони тўлиқ таъмирдан чиқарилиб, "Локомотив" ПФКга топширилади ҳамда ушбу стадиондан мактабимиз тарбияланувчилари фойдаланади" - деди Акрамов.
