Миланнинг “Интер”и ва Лондоннинг “Челси” клублари ҳужумчи Ромелу Лукакунинг Италия жамоаси таркибида ижара муддатини узайтириш бўйича келишувни якунлашга яқин турибди, деб ёзади инсайдер Фабрицио Романо ўзининг Twitter саҳифасида.
Манбага кўра, "Интер" бельгиялик ҳужумчининг ижара муддатини яна бир мавсумга узайтириш учун "Челси"га трансфер бюджетидан 7,8 миллион евро ўтказган.
Лукаку жорий ижара муддати тугаганидан кейин ёзда инглиз клубига қайтиши керак эди. Бироқ ҳар икки клуб раҳбарияти ҳамда футболчининг ўзи Лукакунинг итальян жамоасида ўйнашда давом этишидан манфаатдор. Томонлар ўртасидаги музокаралар якуний босқичга кирмоқда, бироқ ҳозирча ҳеч нарса расман эълон қилинмаган.
Лукаку ёзги трансфер ойнасида "Челси"дан ижара асосида миланликлар сафига қайтди. Бир йил аввал "Интер" ҳужумчини лондонликларга 113 миллион еврога сотганди. "Интер"га қайтганидан бери бельгиялик футболчи жароҳат туфайли бор-йўғи 4та ўйинда майдонга тушиб, 2та гол урган.
