Ўзбек футболининг 100 йиллиги тантаналарига салкам бир ой муддат қолди. 28 август куни янги қурилаётган “Бунёдкор” стадионида Ўзбек футболининг юбилейи нишонланади.
ЎФФ томонидан 2012 йилнинг феврал ойида эълон қилинган ўзбек футболининг 100 йиллик юбилейини нишонлаш бўйича тадбирлар режасига кўра, тарихий сана бўйича тантаналар Тошкент шаҳрида янги қурилаётган “Бунёдкор” стадионида ўтказилиши кўзда тутилган.
Ҳозирги кунгача Чилонзор туманида жойлашган янги “Бунёдкор” стадионининг томлари ёпиб бўлинган, айни вақтда стадион ва унга ёндош ҳудудлардаги обектларда сўнгги қурилиш ва пардозлаш ишлари олиб борилмоқда. Кўп эҳтимолки, қурилиш ишлари 28 августга якунланиб бўлади ва ўзбек футболининг 100 йиллиги тантаналарига “Бунёдкор” стадиони мезбонлик қилади.
ЎФФ матбуот котиби Санжар Ризаевнинг ўз твиттерида хабар беришича, айни вақтда қурилиш ишлари жадал суръатларда давом этмоқда.
“Бунёдкор” стадионинг ҳозирги ҳолати кўпчиликда жиддий қизиқиш уйғотиши табиий. Шу мақсадда “Кун.уз” таҳририяти шу мавзуда фотогалерея эълон қилади. Бунда кўрсатган ёрдами учун ЎФФ матбуот котиби Санжар Ризаевга миннатдорчилик билдирамиз.
