“Милан” ҳужумчиси Златан Ибраҳимович Криштиану Роналдунинг Уэйн Рунига қарши айтган сўзларига фикр билдирди. Эслатиб ўтамиз, аввалроқ португалиялик футболчи Рунининг танқидидан хафа бўлган ва Пирс Морганга берган интервьюсида Уэйн унга ҳасад қилганини айтганди.
“Ким Уэйн Руни билан бирга ўйнаса, хурсанд бўлиши керак, чунки Уэйн ҳужумдаги шерикларини яхшироқ қилди. Роналду учун ҳам худди шундай. Руни кўп ишларни унинг учун қилди, аммо урилган голлар туфайли шон-шуҳрат Криштиануга насиб этди", - дея Ибраҳимовичнинг сўзларидан иқтибос келтиради Centredevils.
Эслатиб ўтамиз, Руни 2016/17 йилги мавсумда Жозе Моуриньо қўл остида Ибраҳимович билан "Манчестер Юнайтед"да ўйнаган.
