Франция терма жамоаси ҳужумчиси Килиан Мбаппе сўнгги 64 йил ичида жаҳон чемпионати плей-офф босқичида бешта гол урган энг ёш тўпурарга айланди.
23 ёшу 349 кунлик бўлган ҳужумчи 1958 йилги жаҳон чемпионатида 17 ёшу 249 кун давомида шундай муваффақиятга эришган Бразилия терма жамоасининг афсонавий футболчиси Пеледан кейин бу натижага эришган илк футболчи бўлди.
Мбаппе ЖЧ-2018 плей-офф босқичида учта (Аргентинага дубль ва финалда Хорватияга гол) ва 2022 йилги Жаҳон чемпионатида (Польшага қарши дубль) иккита гол урди.
Мбаппе, шунингдек, иккита жаҳон чемпионатида учтадан кўп гол урган биринчи француз бўлди.