"Барселона" ярим ҳимоячиси Серхио Бускетс Испания Суперкубоги финалида "Реал" устидан қозонилган ғалабадан кейин (3:1) жамоадоши Гави ўйини ҳақида гапирди.

Учрашувда 18 ёшли ярим ҳимоячи гол уриб, иккита голли узатмани амалга оширди ва учрашувнинг энг яхши футболчиси деб топилди.

"Гави? Биласизми, у қанчалик рақобатбардош, у жуда ёш. Бу ёшда кўпчилик ёшлар жамоасида ўйнайди, аммо у ақл бовар қилмайдиган даражани кўрсатади, голли узатма беради, гол уради. Унинг келажаги порлоқ ва ўсиш учун кўплаб имкониятлар бор. Умид қиламанки, у "Барселона"да янги даврни белгиловчи футболчига айланади", - дея Бускетснинг сўзларини келтиради Marca.

Жорий мавсумда Гави Каталония клуби сафида 24 та ўйинда майдонга тушиб, 1 та гол урди ва 5 та голли узатмани амалга оширди.