Лондоннинг "Челси" клуби Қатарда бўлиб ўтган 2022 йилги жаҳон чемпионатининг энг яхши ёш футболчиси, "Бенфика" ярим ҳимоячиси Энцо Фернандесни қўлга киритмоқчи. Бу ҳақда Португалиянинг Record нашри хабар бермоқда.
Манбага кўра, "Челси" аввалги келишув муваффақиятсизликка учраганидан сўнг таслим бўлмаган ва жорий қишки трансфер ойнаси тугагунига қадар аргентиналик ярим ҳимоячини сотиб олиш учун "Бенфика"га яна бир таклиф билан чиқади.
Аввалроқ, "Бенфика" Фернандесни трансфер қилиш бўйича "Челси"нинг барча таклифларини рад этгани маълум бўлганди. Лондонликлар аргентиналик учун 3 нафар футболчи ва 90 миллион евро таклиф қилишди. "Аристократлар" 22 ёшли ярим ҳимоячи учун ҳам 127 миллион евро тўлашлари мумкин эди, аммо трансфер амалга ошмади.
