Туркияда машғулотларни давом эттираётган “Навбаҳор” жамоаси бугун хориж йиғинидаги навбатдаги назорат учрашувини Болгариянинг “Септември” (София) клубига қарши ўтказиб, 4:2 ҳисобида ғалаба қозонди.

“Лочинлар” учрашувни анча ишончли тарзда ўтказиб, биринчи бўлимнинг ўзида Асадбек Собиржонов ва Шоҳруз Норхоновларнинг голлари туфайли танаффусга 2:0 ҳисобидаги ғалаба билан чиқиб кетишди. Танаффусдан кейин Жамшид Искандеров ва Иброҳим Йўлдошевлар ҳам биттадан гол уриб, ғалабани мустаҳкамлашди. Ҳисоб йирик кўринишга келгач, “Навбаҳор” футболчиларини бироз хотиржамликка берилишларидан Болгария клуби фойдаланиб, иккита гол билан жавоб қайтаришга эришди. Бироқ, “лочинлар” рақибга бошқа имконият бермай ишончли ғалабани қўлга киритишди.

Хориж йиғинида “Навбаҳор” бунга қадар иккита назорат ўйинида майдонга тушиб, биттадан ғалаба ва мағлубият қайд этганди.