2011 йилда 50 ёшли бизнесмен Эндрю Веллс "Premier Relocation" номли ширкатга асос солади. Веллснинг компанияси ўн йилдан ортиқ вақт давомида футболчиларни Европа ва океанортидан кўчиб келиши ва кетишига ёрдамлашиб келади. Узоқ вақт давомида Веллс кўплаб футбол юлдузлари билан ишлади. Улар ичида Бруну Фернандеш, Мартин Эдегор, Эрлинг Холанд, Филиппе Коутиньо каби номлар бор. Яқинда Роналду "МЮ"дан кетганида, айнан "Premier Relocation" унинг нарсаларини Англиядан Португалияга ташиб берганди.
Веллс ва унинг жамоаси футболчиларга фақатгина, нарсаларини бир жойдан бошқа жойга кўчиришгагина ёрдам бериб қолмайди. Улар ўйинчининг руҳиятидаги ўзгаришлар билан ҳам ишлайди. Футболчига стрессни енгиш ва янги муҳитга кўникишда кўмаклашади. Айрим ёш юлдузлар Энди ва унинг жамоасидан қолиш, ва улар билан PlayStation ўйнашини ҳам илтимос қилган.
Компаниянинг бизнеси фақат АПЛ клублари билан чекланмайди. Веллс яқинда Барселона ва Мадрид шаҳарларида ҳам ўз офисларини очган. Айрим операциялар эса денгизортига қадар амалга оширилади. Масалан, Фил Невилл айнан "Premier Relocation" орқали Майамига кўчиб борганди.
Веллс фаолияти ҳақида фикр билдирар экан, шундай дейди: "Мен футболчилардан тез-тез шикоятлар эшитиб қоламан. Улар кўпинча ўзига кўрсатилаётган хизматлар сифатидан нолишади. Уларни эшитар эканман, футболчиларга нима керак эканини янада яхшироқ англадим. Биз уларнинг эҳтиёжларини энг яхши усуллар билан қондирамиз. Компаниям ташкил этилаётган пайтда, мен кўплаб клубларга бориб футболчилар фикрини ўрганганман. Шу сабабли ҳозир ҳаммасини яхши биламан.
Хизматларимиздан, ҳатто, спорт агентлари ҳам фойдаланишади. Улар ўз соҳамизда бренд яратишимизда катта ёрдам берган. Бугун эса кўпчилик футболчилар бошқалардан кўра бизни афзал кўрмоқда. Чунки, биз ҳақимизда яхшироқ билишади. Улар кўплаб қимматбаҳо нарсаларга эга. Шундай экан, у нарсаларни кўчириш осон кечмайди. Буюмлар ичида 300 минг фунтлик суперкарлардан тортиб, оддий расмгача бўлади. Ҳамма – ҳар хил. Шундай экан, барчанинг кўнглини топишга интиламиз".
"Premier Relocation" учун ёш футболчилар билан ишлаш жуда муҳимдир. Биринчидан, улар бир клубга кўчиб ўзини яхши кўрсата олса, эртага у билан оиласи ҳам кўчиб келади. Бу эса Веллсга яна янги иш яратади. Иккинчидан эса ёш футболчиларни бир жойдан иккинчи жой максимал қулайлик билан кўчириб қўйиш келажакка қилинган сармоя ҳамдир. Келажакда уларнинг юлдузга айланиши, шаксиз Веллснинг компаниясини ҳам янада машҳур қилади.
Веллс ширкати "Samsung" билан ҳамкорлик қилади. Улар футболчиларни янги уйга кўчириб қолмай, юлдузларга қулайлик ҳам яратиб қўяди. Янги жойда маиший қулайлик яратиш учун эса "Samsung" ёрдамга келади. "Premier Relocation" футболчилар уйига "Samsung" маҳсулотларидан ўрнатиб ҳам беради: телевизор, совуткич, кир ювиш машинаси ва бошқалар.
"Биз доимо ёрдамга тайёрмиз. Чунки барча футболчилар бир хил сифатли хизматдан фойдаланишга лойиқ. Шу сабабли биз ёрдамга шаймиз", – дейди Эндрю Веллс.
ИСМАТОВ Ж.
