«Дўстлик Тошкент» жамоаси 2022 йилги мавсум якунларига кўра Биринчи лига мусобақа жадвалида 7-поғонани банд этган эди.  

2020 йилда ташкил этилган, профессионал клубга айланиш мақсадида секин-аста шаклланаётган жамоа ўз молиялаштириш манбааси, бош ҳомий билан тузилган шартномаси, шунингдек, жамоа стадиони, ўқув-машғулот қароргоҳи бўйича ҳужжатларни Лигага тақдим этди ҳамда Биринчи лиганинг 2023 йилги мавсумида ҳам иштирок этадиган бўлди.

«Дўстлик Тошкент» Биринчи лига жамоалари орасида тарихда биринчи бўлиб ОФК лицензиялаш жараёнида иштирок этишни режалаштирган. Шу йўл билан у Про лига сари қадам ташлашга ҳаракат қилади. Пойтахтнинг Жар-ариқ мавзесида жамоа базаси жойлашган бўлиб, битта катта ва битта кичик замонавий стадионда унинг болалар ва ўсмирлар жамоалари машғулот ўтказади. «Дўстлик Тошкент»нинг талаб этилган 6 ёш тоифаси бўйича жамоалари Тошкент шаҳар футбол ассоциацияси мусобақаларида иштирок этади. Шунингдек унинг У18 жамоаси ассоциациянинг алоҳида мусобақасида, биринчиликдан ташқари яна бир жамоаси эса Иккинчи лига мусобақасида тўп суради.     

Ўзбекистон Профессионал футбол лигаси болалар футболига жиддий эътибор қаратаётган тадбиркорларни фаол қўллаб-қувватлаб келади. Лига «Дўстлик Тошкент» мисолида Биринчи лига клубларини ҳам лицензиялашга жалб этишни орқали Япония сингари учта дивизион вакилларини жараёнга қўшган Осиёнинг иккинчи мамлакатига айланиши мумкин.

Маълумот учун, «Дўстлик Тошкент» жамоаси «International Logistic Service» МЧЖ томонидан молиялаштирилади. Айни вақтда Жўрабек Ниғматов клуб директори сифатида фаолият олиб бормоқда.