"Барселона" бош мураббийи Хави Эрнандес Эрик тен Хаг жамоасининг ўйинидан ҳайратда.
16 февраль куни “Камп Ноу”да “Барселона” ва “Манчестер Юнайтед” ўртасидаги Европа Лигаси 1/16 финалининг илк учрашуви бўлиб ўтади. Ўйинга тайёргарлик кўриш жараёнида "кўк-анорранглилар" бошқарувчиси "қизил иблислар"нинг яқинда Англия Премьер-лигасида "Лидс" устидан қозонилган 2:0 ҳисобидаги ғалабасини ўрганиб чиқди. Sport нашрининг ёзишича, Хави бўлажак рақибнинг ўйинидан қойил қолган ва ҳозирда тен Хаг жамоаси ўз формасининг энг юқори чўққисида турибди, деган хулосага келган.
"Манчестер Юнайтед" АПЛ турнир жадвалида учинчи ўринни эгаллаб турибди.
