"Интер" Ромелу Лукаку ва Николо Бареллани "Сампдория"га қарши ўйиндаги можаро учун жазоламайди.
А Серия 23-тур учрашувининг 40-дақиқасида Лукакуга Барелла қўлини юқорига кўтаргани ёқмади. Ҳужумчи жамоадошига бақира бошлади ва уни ҳақорат қилди. Кейинроқ “Интер” бош мураббийи Симоне Инзаги футболчиларни ушбу эпизод учун қоралади.
Хабар қилинишича, Лукаку ва Барелла чоршанба куни "Интер"нинг машғулотларида клуб раҳбарияти иштирокида вазиятни ҳал қилишган.
Қайд этилишича, “нерадзуррилар” бошлиқлари футболчиларнинг хатти-ҳаракатларидан норози, аммо можаро бартараф этилгани учун ҳеч қандай чора кўрмайди. Қолаверса, раҳбарият кийиниш хонасида кескин муҳит яратмоқчи эмас ва бундай ҳолатлар бошқа такрорланмаслигига умид қилмоқда.
