Мадриднинг “Реал” клуби нега “Барселона”нинг ҳакам билан боғлиқ можаросига изоҳ беришдан бош тортаётгани маълум бўлди.

Аввалроқ каталонияликлар 2016 йилдан 2018 йилга қадар RFEF техник ҳакамлар қўмитаси собиқ вице-президенти Хосе Мария Энрикес Негрейрага 1,4 миллион евро ўтказгани хабар қилинганди. Клуб бу бўйича баёнот берган ва Футбол федерацияси амалдорига ёш футболчилар ва ҳакамлар ҳақидаги ҳисоботлари учун тўлов амалга оширилганини таъкидлаганди. Шундан сўнг “Барселона” 2003 йилдан бери Негрейрага 4,7 миллион евро тўлагани аниқланди.

“Реал”дан ташқари барча Ла Лига ва Сегунда клублари “Барселона”нинг ҳаракатларини очиқчасига қоралади.

“Клуб учта сабабни кўрсатди ва уларнинг барчаси мантиққа тўғри келади.

Мадрид клуби бундай ишларни 20 йил давомида қоралаб келди ва танқидга учради. Шу вақт давомида клубни ҳеч ким қўллаб-қувватламади.

“Реал” “Ижроқўм йиллар давомида рақобат ўзига хослигини сақлаб қолиши бўйича олиб борилган ишларни инобатга олган ҳолда Ла Лига ҳаракатларини тўлиқ қўллаб-қувватлайди” деб ёзилган аризага қандай имзо чекиши мумкин? Бу ҳазилми?

Қолаверса, “Реал” масъуллар бу баёнотдан ҳимоя мақсадида фойдаланишини истамайди”, — деб айтиб ўтди журналист Антонио Гарсия Ferreрас клуб манбаларига таяниб.

“Эспаньол” “Негрейра иши” деб аталаётган воқеа юзасидан турли ОАВда чоп этилган маълумотлардан хавотирда эканлиги, “Атлетико” эса Ла Лиганинг барча жамоаларидан норозилик ва қораловчи қўшма баёнот беришини хоҳлаётгани маълум бўлганди.