"Челси" ярим ҳимоячиси Андре Сантоснинг ижара асосида "Палмейрас"га ўтиши амалга ошмай қолди, деб хабар беради Sky Sports.
Январь ойида "Васко да Гама"дан сотиб олинган Сантос Англияда ишлаш учун рухсатнома ололмади. "Палмейрас" футболчини декабргача ижарага олиши керак эди, бироқ "Челси" Андрени келаси ёзда 1,3 миллион фунт эвазига эрта қайтариш вариантини талаб қилганидан кейин Бразилия клуби музокараларни тўхтатди.
Сантос, шунингдек, май ойида бўлиб ўтадиган U20 Жаҳон чемпионатида миллий терма жамоа учун ўйнашга рухсат сўраган. Ярим ҳимоячининг бундай узоқ муддат йўқлиги "Палмейрас"га ёқмади ва келишув барбод бўлди.
2022 йилда Сантос "Васко да Гама" таркибида Бразилия Б сериясида 27 та ўйинда майдонга тушди ва 8 та гол урди.
