"Бавария" марказий ҳимоячиси Маттейс де Лигт жамоасининг ортда қолган ҳафтадаги муваффақиятини юқори баҳолади. Эслатиб ўтамиз, Мюнхен клуби аввалига "ПСЖ"ни мағлуб этиб, Чемпионлар лигасининг чорак финалига чиқди, кейин эса Бундеслигада "Аугсбург"ни 5:3 ҳисобида мағлуб этиб, чемпионатнинг якка пешқадамига айланиб олди.
“Бу ҳафта жуда муҳим бўлди. Ҳозир биз чемпионатда пешқадамлик қилмоқдамиз, Чемпионлар лигасининг чорак финалига чиқдик, шунингдек, Германия кубогида ўйнашда давом этамиз. Бу жамоа учун жуда муҳим”, - деди де Лигт “Аугсбург”га қарши ўйиндан кейин берган интервьюсида.
Эслатиб ўтамиз, де Лигт ўтган ёзда Туриннинг "Ювентус" клубидан "Бавария"га ўтган эди. Бундеслиганинг жорий мавсумида нидерландиялик футболчи икки гол урди.