Туриннинг “Ювентус” клуби франциялик ярим ҳимоячи Адриен Рабьо билан шартномани узайтирмоқчи, дея хабар беради La Gazette Dello Sport.

Манбанинг хабарига кўра, итальян клуби футболчининг маошини йилига 10 миллион еврогача, қўшимча бонуслар билан оширмоқчи. Ҳозирда ярим ҳимоячи йилига етти миллион евро олади. Бироқ франциялик футболчи “Ювентус” Чемпионлар лигасига йўл олсагина қолишга тайёр ва ҳозирда клуб 4-ўриндан 7 очко ортда қолмоқда. Аввалроқ футболчига инглиз клублари қизиқиш билдираётгани ҳақида хабар берилганди.

27 ёшли Рабьо жорий мавсумда “Ювентус” сафида барча турнирлар доирасида 33 та ўйинда майдонга тушиб, 9 та гол урди ва 4 та голли узатмани амалга оширди. Унинг клуб билан шартномаси 2023 йилнинг ёзига қадар мўлжалланган.