Робин ван Персининг фикрича, Маркус Рэшфорд фаолиятидаги энг яхши формада.

"Кўряпсизми, у, эҳтимол, фаолиятидаги энг яхши формада. Маркус ўйинига қараганда, у жисмонан соғлом ва диққатини жамлаган кўринади.

Маркус завқланаётганга ўхшайди. Унинг миссияси бор. Ёшлигиданоқ ҳамма унинг нақадар яхши эканлигини билар эди, чунки у асосий жамоага эрта йўл олган. Лекин ҳозир ҳаммаси жойида эканини кўряпмиз ва бу нафақат унинг, балки мураббий ва жамоадошларининг ҳам хизматлари.

Масалан, унинг Бруну Фернандеш билан алоқасига назар ташласангиз, бу ўзига хос нарса. Фаолият давомида бундай алоқа фақат бир нечта ўйинчилар билан содир бўлади. У тобора яхшиланмоқда. Рэшфорд ўсиб бормоқда, у ўзига ишонади. У билан деярли ҳар бир ўйинда кимга қарши бўлишидан қатъи назар, у гол уришини ёки натижани ҳал қилишини биласиз.

Мухлислар нуқтаи назаридан, уни томоша қилиш ҳам ажойиб, чунки у биз ҳар ҳафта, ҳар уч ёки тўрт кунда кўришни истаган Рэшфорд. У катта қувонч келтиради", - деди "Манчестер Юнайтед"нинг собиқ ҳужумчиси.

Жорий мавсумда Рэшфорд "Манчестер Юнайтед" сафида барча турнирларда 44 та ўйинда майдонга тушиб, 27 та гол урди.