ЎФА биринчи вице-президенти Равшан Эрматов Бухоро вилояти Шофиркон туманидаги бўлалар-ўсмирлар футбол академияси фаолияти билан танишди.

Тадбир давомида академия фаолияти, инфратузилмаси ва мавжуд шарт-шароитлари кўздан кечирилди ва болалар, мураббийлар, ота-оналар билан учрашув ташкил этилди. Академия тарбияланувчиларига мотивацион видеороликлар намойиш этилди.

«Бухоро заминида турли ёшдаги терма жамоаларда тўп сурадиган футболчиларни кўпайтириш зарур. Якунига етган Осиё чемпионатида ғолибликни қўлга киритган терма жамоамиз таркибида бухоролик футболчи бўлганлиги болалар учун мотивация вазифасини ўтайди. Мураббийлар томонидан терма жамоаларимизнинг ўйинлари академия тарбияланувчилари учун мунтазам таҳлил қилиниб борилиши керак. Академия ходимлари ўз вазифаларини ҳалол бажаришсагина келажакда юқори натижаларга эришишимиз мумкин», деди Равшан Эрматов.

Футбол академияси фаолияти, хусусан турли ёш тоифасидаги Ўзбекистон терма жамоалари ва клублар учун футболчиларни тайёрлаб бериш кўрсаткичлари таҳлил қилинди. Академия раҳбарларига мураббий ва селекционерлар фаолиятини мониторинг қилиш, машғулотлар сифатини назоратга олиш, ёшлар таълим-тарбиясига жиддий эътибор қаратиш, ўтган мусобақаларни таҳлил қилиш бўйича топшириқлар берилди.

Академиянинг ошхона ва тиббиёт ходимлари билан болалар учун тогри овқатланиш озиқ-овқат тайёрлаш жараёни муҳокама қилинди, витаминизацияни тогри йўлга қойиш муҳимлиги айтилди. Мулоқот давомида академия тарбияланувчилари ўзларини қизиқтирган саволларига жавоб олишди.