O‘FA birinchi vise-prezidenti Ravshan Ermatov Buxoro viloyati Shofirkon tumanidagi bo‘lalar-o‘smirlar futbol akademiyasi faoliyati bilan tanishdi.

Tadbir davomida akademiya faoliyati, infratuzilmasi va mavjud shart-sharoitlari ko‘zdan kechirildi va bolalar, murabbiylar, ota-onalar bilan uchrashuv tashkil etildi. Akademiya tarbiyalanuvchilariga motivasion videoroliklar namoyish etildi.

«Buxoro zaminida turli yoshdagi terma jamoalarda to‘p suradigan futbolchilarni ko‘paytirish zarur. Yakuniga yetgan Osiyo chempionatida g‘oliblikni qo‘lga kiritgan terma jamoamiz tarkibida buxorolik futbolchi bo‘lganligi bolalar uchun motivasiya vazifasini o‘taydi. Murabbiylar tomonidan terma jamoalarimizning o‘yinlari akademiya tarbiyalanuvchilari uchun muntazam tahlil qilinib borilishi kerak. Akademiya xodimlari o‘z vazifalarini halol bajarishsagina kelajakda yuqori natijalarga erishishimiz mumkin», dedi Ravshan Ermatov.

Futbol akademiyasi faoliyati, xususan turli yosh toifasidagi O‘zbekiston terma jamoalari va klublar uchun futbolchilarni tayyorlab berish ko‘rsatkichlari tahlil qilindi. Akademiya rahbarlariga murabbiy va seleksionerlar faoliyatini monitoring qilish, mashg‘ulotlar sifatini nazoratga olish, yoshlar ta’lim-tarbiyasiga jiddiy e’tibor qaratish, o‘tgan musobaqalarni tahlil qilish bo‘yicha topshiriqlar berildi.

Akademiyaning oshxona va tibbiyot xodimlari bilan bolalar uchun togri ovqatlanish oziq-ovqat tayyorlash jarayoni muhokama qilindi, vitaminizasiyani togri yo‘lga qoyish muhimligi aytildi. Muloqot davomida akademiya tarbiyalanuvchilari o‘zlarini qiziqtirgan savollariga javob olishdi.