"Бавария" "Аталанта" ва Дания терма жамоаси ҳужумчиси Расмус Хойлундга қизиқиш билдирмоқда.

Tuttomercatoweb хабарига кўра, 20 ёшли футболчи бошқа клубга ўтишга тайёр. "Бавария" уни қўлга киритиш учун "Ювентус" билан рақобатлашади.

Қайд этилишича, итальян клуби узоқ вақтдан бери даниялик футболчини кузатиб келмоқда ва уни сотиб юборилиши мумкин бўлган Душан Влаховичнинг ўрнига кўрмоқда. Аммо Роберт Левандовскининг ўрнини боса олмаган "Бавария" янги ҳужумчига кўпроқ муҳтождир ва тахминларга кўра, янги бош мураббий Томас Тухель Хойлундга эътибор қаратган бўлиши мумкин.

Ҳужумчи 2022 йилнинг ёзидан буён “Аталанта”да тўп сурмоқда. Унинг амалдаги шартномаси 2027 йилнинг июнигача амал қилади.

Жорий мавсумда Хойлунд клуб сафида барча турнирлар доирасида 25 та ўйинда майдонга тушиб, 8 та гол урди ва 2 та голли узатмани амалга оширди. Transfermarkt маълумотларига кўра, футболчининг нархи 35 миллион еврони ташкил қилади.