"Реал" бош мураббийи Жозе Моуриньо чемпионлар лигаси гуруҳ босқичида "Манчестер Сити" устидан қозонилган иродали ғалабадан сўнг фикрлари билан ўртоқлашди.

"Менинг ўта хурсандчилигим? Ўйинчилар мени ҳиссётларимни шундай намойиш этишга мажбур қилдилар. Агар сиз "Барселона" ва "Манчестер Сити"ни юта олсангиз , ҳар доим ғолиб бўлишингиз мумкин.

Баъзи журналистлар аллақачон матнларни тайёрлаб қўйишган эди, кейин эса ёзганларини ўчиришларига тўғри келди. Бизнинг голларимиз уларга ноутбукларни қайта очиб, тезроқ ишлашга мажбур қилди.

Ғалаба қозонганимиздан хурсандман, аммо мағлубиятга учраганимизда ҳам  мағрур бўлар эдим, чунки "Реал" ўзининг ДНКсини кўрсатди. Бу нимани англатади? Фидокорликни англатади, ўз фалсафасига хиёнат қилгандан кўра, майдонда ўлиш афзаллигини билдиради.

Бугун менинг ўйинчиларим уйларига чарчаган ҳолда равона бўлишади. Бу мавсумда фақатгина "Барселона"га қарши ўйинда шундай бўлган эди.

Мен нега Серхио Рамосни алмаштирдим? Бу саволни кутган эдим - ҳамма ҳар хил воқеаларга қизиқади. Аммо бу шунчаки техник қарор эди. Бизда Серхионинг феъл-атвори билан боғлиқ муаммолар йўқ. У ажойиб йигит ва аъло спортчи", - дея Моуриньонинг сўзларини келтиради AS.

Қўшимча қиламиз, "Манчестер Сити" ўйин давомида икки марта ҳисобда олдинга чиқиб олган эди.