Испаниялик мутахассис Рафаэль Бенитес Брендан Рожерснинг ўрнига "Лестер" бош мураббийи бўла олмайди, деб хабар бермоқда Sky Sports.
Нашрнинг ёзишича, Англия Премьер-лигаси клуби раҳбариятининг Бенитес билан музокаралари ҳеч қандай натижа бермаган, томонлар келишувга эриша олишмаган.
Британия ОАВлари бу вазиятда "тулкилар" бош мураббийи этиб Дин Смитга ишонч билдиришдан бошқа иложи йўқлигига амин бўлишмоқда. "Астон Вилла"ни Премьер-лигага олиб чиққан мураббий ўтган йилнинг декабрида "Норвич" томонидан ишдан бўшатилди. У билан шартнома мавсум якунига қадар тузилади, Крейг Шекспир ва Жон Терри эса Смитнинг ёрдамчиларига айланади.
Қўшимча қиламизки, Шекспир 2016 йилда "Лестер" лига чемпиони бўлганида Клаудио Раньери штабида бўлган, сўнгра италиялик мураббий истеъфога чиқарилганидан кейин бош мураббий бўлиб ишлаган.