"Челси" ҳимоячиси Марк Кукурелья фаолияти давомида дуч келган энг қийин рақиб ҳақида гапирди. Испаниялик футболчи "Манчестер Сити" ярим ҳимоячиси Кевин де Брюйне номини тилга олди. Бельгиялик футболчи ўтган ҳафта АПЛдаги 100-ассистентини амалга оширди.
"Менинг энг қийин рақибим? Кевин де Брюйне. У кўп вазиятлар яратадиган жуда кучли футболчи. Ҳимоячилар унга алоҳида эътибор қаратишлари керак, чунки агар унинг учун бўш жой ёки имконият бўлса, у осонгина голли вазият яратади ёки ўзи гол уради", - деди Кукурелья Goal билан суҳбатда.
Марк бу мавсумда "Манчестер Сити"да Де Брюйне билан бирга ўйнаши мумкин эди, аммо "шаҳарликлар" "Брайтон"га керакли миқдорни тўлашдан бош тортишди. Натижада Кукурелья "Челси"га келиб қўшилди.
