Айни дамда Лондоннинг “Челси” клубида ижарада ўйнаётган “Атлетико Мадрид” ҳужумчиси Жоау Феликс жорий мавсум охирида испан клубига қайтмайди. Бу ҳақда Sun Sport хабар бермоқда.
Манбага кўра, 23 ёшли португалиялик футболчи "Челси"даги ижара муддатини узайтирмоқчи.
Олдинроқ "кўклар"нинг янги эҳтимолий бош мураббийи Маурисио Почеттино клуб раҳбариятидан Феликсни доимий равишда жамоада олиб қолишни сўрагани хабар қилинганди.
Феликс жорий мавсум “Челси” сафида 16 та ўйинда майдонга тушиб, 2 та гол уришга эришди. Transfermarkt Португалия терма жамоаси футболчисини 50 миллион еврога баҳоламоқда.
АПЛнинг 32-туридан сўнг лондонликлар 39 очко билан турнир жадвалида 11-ўринда бормоқда.
