“Челси” ҳужумчиси Пьер-Эмерик Обамеянг ёзги трансфер ойнасида “Барселона”га қайтиши мумкин. Бу ҳақда Sport.es нашри хабар бермоқда.

Бироқ испан клуби 33 ёшли футболчини фақат текин трансфер эвазига ўз сафига қўшиб олишга тайёр. "Челси"нинг режаларига кирмаган Обамеянг билан шартномани бекор қилиш бўйича музокаралар олиб борилмоқда, аммо улар ҳали муваффақиятга эришмаган.

Пьер-Эмерик Обамеянг 2022 йилнинг январидан августигача "Барселона" футболчиси бўлган. Жамоа сафида 24 та ўйинда майдонга тушган габонлик ҳужумчи 13 та гол ва 1 та голли узатмани амалга оширган. Обамеянг жорий мавсумда "Челси"да ўйнамоқда. "Кўклар" габонлик ҳужумчи учун 12 миллион евро тўлаган. "Ауба" "кўклар" сафида 21та ўйинда майдонга тушиб, 3та гол ва 1та голли узатмани амалга оширган.