Швейцариялик ярим ҳимоячи Гранит Жака жорий мавсум якунида Лондоннинг «Арсенал» клубини тарк этишни режалаштирмоқда, деб хабар бермоқда The Sun таблоиди журналистлари.

Манба берган хабарга кўра, 30 ёшли ярим ҳимоячи фаолиятини Германия Бундеслигасида давом эттириш вариантини кўриб чиқмоқда.

Гранитга «Байер» Леверкузенда иш таклифи бор. Қайд этилишича, шунингдек, «канонирлар» устози Микель Артета ҳам Жаканинг трансферига қарши эмас.

Швейцариялик футболчи 2016 йилдан буён «Арсенал»да ўйнаб келмоқда. Унинг клуб билан шартномаси келаси йилнинг ўрталарига қадар амал қилади.

Гранит жорий мавсумда 44 та ўйин ўтказиб, 7 та гол урди ва 7 та голли узатмани амалга оширди.