Мана мамлакатимиз чемпионатининг 22-тури ҳам ўз ниҳоясига етди. Бу йил чемпионатимиз ўзгача кўриниш олмоқда. Кеча кутилмаганда "қалдирғочлар"нинг мағлубияти, бу йилги асосий соврин учун курашни янада қизиқарли бўлишини "таъминлаб" берди.
Агар бу йилги чемпионатни ўтган йилгига таққослайдиган бўлсак, "Бунёдкор" жамоаси ўтган йили 22-турдан сўнг деярли чемпионликни нақд қилиб қўйган эди.
Улар ўзларини тақиб қилиб келаётган "Насаф" жамоасидан 10 очко узиб кетишган эди. Бу йил эса 22-турдан сўнг очколари тенг бўлиб турибди. Балки Миржалол Қосимов бу йил асосий эътиборини ОЧЛга қаратган бўлиши ҳам мумкин, қолаверса бу йилги мавсумда ким чемпион бўлишини охирги турлар аниқлаб берса ҳам ажаб эмас.
Шуниси диққатга сазоворки, чемпионлик учун кўрашаётган "Пахтакор", "Насаф" ва "Бунёдкор" жамоалари ўтган йилги кўрсаткичларини деярли сақлаб қолган.
Энди турнир жадвалининг пешқадамлари олдида турган учрашувларга тўхталадиган бўлсак, 23-турда "Насаф" ўз майдонида "Пахтакор"ни қабул қилади. Ушбу учрашув натижаси ҳар иккала жамоа учун жуда муҳим бўлади, ҳар йилги чемпионатда ушбу иккала жамоа ўртасидаги учрашув, уларнинг турнир жадвалидаги мавқиедан қатъий назар муросасиз ва ҳаяжонга бой тарзда ўтган, шунинг учун иккала жамоа ўртасидаги учрашувни 23-турнинг марказий учрашуви деб атасак ҳам бўлаверади. "Пахтакор" 25-турда Олмалиққа сафар уюштиради, "Бунёдкор" эса 24-турда "Шўртан"нинг меҳмони бўлади. "Насаф" олдида эса яна бир марта водийликлар тўсиғидан ўтишга тўғри келади, "ажадарлар" 24-турда "Нефтчи"га қарши майдонга тушишади. Демак, қолган турлар ҳам бу жамоалар учун осон кечмайди, чунки ҳар қандай жамоа учун ўз олдига қўйган мақсадларни амалга ошириш учун охирги имкониятлар қолди, шундай экан ҳар-бир учрашув мисли финалдек бўлиши турган гап. "Насаф" футбол клуби бош мураббийи Усмон Тошев учун ҳам "аждарлар" учун ҳам навбатдаги тур ҳақиқий синов бўлиши турган гап, иккинчи даврада анча мазмунли ўйин намойиш этаётган "Пахтакор"га қарши, ўртадаги қисқа танаффусдан фойдаланиб, пухта тайёргарлик кўриш талаб этилади. Хўш, олдинда пешқадамлар учун қандай учрашувлар қолди? Марҳамат танишинг:
23-тур: "Насаф"-"Пахтакор", "Бунёдкор"-"Навбаҳор"
24-тур: "Нефтчи"-"Насаф", "Шўртан"-"Бунёдкор", "Пахтакор"-"Динамо"
25-тур: "Насаф"-"Локомотив","Олмалиқ"-"Пахтакор", "Бунёдкор"-"Қизилқум"
26-тур: "Насаф"-"Динамо", "Машъал"-"Бунёдкор", "Пахтакор"-Бухоро"
Энди эса, ўтган йилги ва жорий йилдаги турнир жадвалини ўзингиз таққослаб кўринг:
Ўтган йилги чемпионатимиз 22-туридан кейинги турнир жадвалининг кўриниши
| № | Жамоалар | Ў | Ю | Д | М | Т-Н | О |
| 1 | Бунёдкор | 22 | 17 | 4 | 1 | 47 - 11 | 55 |
| 2 | Насаф | 22 | 13 | 6 | 3 | 35 - 12 | 45 |
| 3 | Пахтакор | 22 | 13 | 5 | 4 | 27 - 12 | 44 |
| 4 | Нефтчи | 22 | 11 | 4 | 7 | 28 - 24 | 37 |
| 5 | Машъал | 22 | 10 | 4 | 8 | 26 - 28 | 34 |
| 6 | Навбаҳор | 22 | 8 | 7 | 7 | 24 - 19 | 31 |
| 7 | Олмалиқ | 22 | 8 | 4 | 10 | 34 - 35 | 28 |
| 8 | Шўртан | 22 | 8 | 3 | 11 | 25 - 37 | 27 |
| 9 | Андижон | 22 | 7 | 5 | 10 | 26 - 32 | 26 |
| 10 | Металлург | 22 | 8 | 1 | 13 | 32 - 40 | 25 |
| 11 | Кизилкум | 22 | 6 | 5 | 11 | 21 - 33 | 23 |
| 12 | Бухоро | 22 | 6 | 5 | 11 | 16 - 33 | 23 |
| 13 | Динамо | 22 | 6 | 4 | 12 | 17 - 22 | 22 |
| 14 |
Сўғдиёна |
22 | 3 | 3 | 16 | 26 - 46 | 12 |
Жорий йилдаги турнир жадвалининг кўринишига эътибор беринг
| № | Жамоалар | Ў | Ю | Д | М | Т-Н | О |
| 1 | Пахтакор | 22 | 14 | 5 | 3 | 40 - 15 | 47 |
| 2 | Насаф | 22 | 13 | 6 | 3 | 35 - 15 | 45 |
| 3 | Бунёдкор | 22 | 13 | 6 | 3 | 25 - 16 | 45 |
| 4 | Шўртан | 22 | 12 | 3 | 7 | 36 - 23 | 39 |
| 5 | Локомотив | 22 | 11 | 6 | 5 | 33 - 20 | 39 |
| 6 | Нефтчи | 22 | 9 | 5 | 8 | 31 - 24 | 32 |
| 7 | Бухоро | 22 | 8 | 4 | 10 | 20 - 26 | 28 |
| 8 | Олмалиқ | 22 | 7 | 4 | 11 | 29 - 38 | 25 |
| 9 | Қизилқум | 22 | 6 | 7 | 9 | 21 - 36 | 25 |
| 10 | Динамо | 22 | 7 | 2 | 13 | 21 - 25 | 23 |
| 11 | Навбаҳор | 22 | 6 | 6 | 10 | 17 - 28 | 24 |
| 12 | Машъал | 22 | 6 | 4 | 12 | 18 - 34 | 22 |
| 13 | Металлург | 22 | 6 | 3 | 13 | 23 - 42 | 21 |
| 14 | Андижон | 22 | 4 | 3 | 15 | 24 - 41 | 15 |
Фикримизча, бу йилги чемпионатда чемпионни олдиндан башорат қилишга ҳали вақт бор. Чунки биз кутмаган натижалар қайд этилмоқда. Бу йилги чемпионатимиз аввалгиларига ўхшамаяпти. Балки, биз олдинда янада кутилмаган натижаларга гувоҳ бўлишимиз ҳам мумкин.
