Англия терма жамоаси ва "Вест Хэм" ярим ҳимоячиси Деклан Райс "Арсенал"нинг жорий трансфер ойнасидаги асосий мақсади бўлиб қолмоқда.
The Athletic журналистларига маълум бўлишича, "канонирлар" раҳбарияти 24 ёшли ижрочининг трансфери бўйича "болғачилар"га биринчи расмий таклиф билан чиққан. Тафсилотлар ҳозирча ошкор этилмаган.
Футболчи учун баҳсда "Арсенал"нинг рақиби АПЛнинг амалдаги чемпиони "Манчестер Сити" ҳисобланади.
Аввалроқ Декланнинг трансфери потенциал харидорга 115 миллион еврога тушиши хабар қилинганди.
Райс ўтган мавсумда Премьер-лигада 37 та ўйинда майдонга тушиб, 4 та гол урди ва 2 та голли узатмани амалга оширди.