Клубга қилган 11 йиллик хизматидан кейин Давид Де Хеанинг "МЮ"даги фаолияти якун топиши мумкин. Англиядаги дебют мавсумидан кейин, испаниялик дарвозабон йиллар давомида АПЛнинг энг кўп маош олувчи футболчиси сифатида бўй кўрсатади. Гарчанд сўнгги мавсумда энг кўп қуруқ ўйин ўтказганига қарамасдан, "қизил иблислар" посбони жамоадан кетишга кун сайин яқин келмоқда. У эркин агент сифатида клубни тарк этади. Қуйида Де Хеа ўрнини эгаллаши мумкин бўлган номзодлар ҳақида сўз боради.
1. Диегу Кошта
Португалия терма жамоаси аъзоси анчадан бери "МЮ" томонидан кузатиб келинаётган эди. Аммо футболчининг ўзи "Порту"да фаолиятини давом эттиришини билдирган. Шунга қарамай, "МЮ" Португалия клуби сўраётган 64 миллион фунтни тўлаб, Коштани ўзиники қилиши ҳам мумкин. У ўтган мавсумда аниқ паслар ва қуруқ ўйинлар борасида Португалия чемпионатининг энг яхшиларидан бирига айланган эди.
2. Давид Райя
"Брентфорд" вакилининг амалдаги битими 2024 йилда якунланади. Шу сабаб унинг клуби дарвозабонни сотишга ҳаракат қилмоқда. Райя учун "Тоттенхэм" таклиф юборган. Аммо "арилар" сўраётган 40 миллион фунт, бу трансфернинг амалга ошишига тўсқинлик қилади. "Манчестер Юнайтед" ҳам Райя учун пойгада иштирок этиши айтилган. Ўтган мавсумда испаниялик футболчи энг кўп сейв ижро этган дарвозабонга айланган эди. Райянинг қўлдан ташқари оёқда ҳам яхши ҳаракат қилиши кўплаб клублар эътиборини тортмасдан қўймайди.
3. Жордан Пикфорд
Пикфордни ҳамма танийди. У бир неча йиллардан бери Англия терма жамоаси асосий таркибида ишончли ҳаракат қилиб келмоқда. Эрик тен Хаг унинг нималарга қодир эканини яхши билади. Апрель ойида "МЮ"га қарши кечган баҳсда Пикфорд тен Хаг кўз-олдида 9 та сейв ижро этган эди. У, шунингдек, "Эвертон"ни АПЛда олиб қолишда катта ҳисса қўшди.
4. Андре Онана
Онана ўзини "Аякс" сафида, Эрик тен Хаг бошчилигида намойиш этган эди. Камерун терма жамоаси аъзоси замонавий дарвозабонларга хос бўлган барча хусусиятларга эга. Аммо унинг майдондан ташқаридаги айрим ишларини оқлаб бўлмайди. Допинг можароси унинг фаолиятига ёмон таъсир қилди. Аммо сўнгги мавсумда Онана "Интер" билан фантастик мавсум ўтказа олди. 27 ёшли футболчи ЕЧЛ доирасида энг кўп сейв қилган(48) ва энг кўп қуруқ ўйин (8 та) ўтказган дарвозабонга айланди.
5. Майк Меньян
Кўпчилик "Милан" Доннарумма билан хайрлашганида, клубни айблаган эди. Аммо италиялик голкипер ўрни, тез орада тўлдирилганди. "Лилл"дан Меньянни олиб келиш орқали "нераззурилар" 2022 йилда Италия чемпионлигини қўлга киритади. Дарвозабон ўзининг ақлбовар қилмас барқарор ўйини билан ажралиб туради. Шу сабабли тез орада Франция термасидаги асосий ўрин Льорисдан Меньянга ўтиши кутилмоқда. 27 ёшли посбон, шубҳасиз Де Хеага яхши ўринбосар бўлади. Аммо уни сотиб олиш осон эмас.
ИСМАТОВ Ж.
