"Челси" ҳужумчиси Кай Хаверц ёзги трансферлар ойнасида ўз жамоасини тарк этади. Футболчи учун "Арсенал" даъвогарлик қилмоқда. Уни олиб келишнинг ўзига яраша сабаблари мавжуд. АПЛдаги ўзини топ-клуб деб ҳисоблайдиган ҳар қандай жамоа "Манчестер Сити"ни мағлуб этишга қодир бўлган таркиб тузишга ҳаракат қилмоқда. Айниқса, "Арсенал" учун бу масала ўта принципиал аҳамият касб этади. Шу сабабли, жамоа таркиби лондонликлар учун фақатгина ривожланиши ва 2023-24 йилги мавсумга тайёр бўлиши керак. Шу мақсадда "Арсенал" Кай Хаверцга кўз тикиб турибди. Ҳа, немис ҳужумчиси АПЛга келганидан бери ўта оғир даврларни бошидан ўтказди. Аммо "Эмиратес" стадионига кўчиш футболчи учун ҳаммасини ўзгартириши мумкин.
Эҳтимолий трансфер тафсилотлари
Шу кеча-кундузда "Арсенал" Хаверц учун жиддий даъво қила бошлади. Ҳужумчининг ўзи ҳам "Челси"дан кетишга тайёр турибди. Шу сабаб трансфернинг амалга ошиш эҳтимоли жуда ҳам баланд саналади.
"Челси" нима учун Хаверсни сотишга рози бўлмоқда? Бу саволга биринчи жавобни футболчининг шартномасидан излаш керак. Хаверц 2025 йилда эркин агентга айланади. Шу сабабли уни вақтида пуллаш зарур. Қолаверса, Германия терма жамоаси аъзосининг ўзи ҳам ортиқ Ғарбий Лондонда қолишни истамаётир. Мана шу факторлар бирлашиб, "Арсенал" ва "Челси" ўртасида келишувни юзага келтиради. Икки Лондон клуби ўртасидаги ишга "Бавария" суқулиб кириши мумкинлигини ҳам эсдан чиқармаслик керак. Хаверц трансферида учраши кутилаётган энг катта муаммо бу нарх масаласидир. "Челси" 24 ёшли юлдузини 70 миллиондан камига сотмоқчи эмас. "Арсенал" эса бир футболчи учун бунча кўп пул сарфлай олмайди. Айниқса, асосий таркибга кириш борасида Хаверцда имкониятлар кўп эмаслиги, бу муаммони қайта ўйлаш керак эканини англатади. Шундай бўлсада, "Арсенал" қўйилган нархни туширишни эплай олишига ишонмоқда.
Кай Хаверц ҳақида "Арсенал" афсонаси Тьерри Анри шундай деган эди: "Баъзида Кай менга Робин ван Персини эслатади. Робин чап оёғида кучли зарбага эга бўлган. Кайда ҳам шундай ҳолат. Шу сабаб мен уни "Арсенал"да кўришни истайман".
Нега "Арсенал" айнан Кай Хаверцга интилмоқда?
Бу борада, аввало шуни таъкидлаш керакки, "Арсенал"га янги мавсумдан ҳужумда кўпроқ ижодкорлик ва тезлик ярата оладиган тактик қуроллар керак бўлади. Ҳозирда тўпчиларнинг иккита марказий ҳужумчиси бор: Габриэль Жезус ва Эдди Нкетиа. Аммо уларнинг ҳеч бири яққол тўпурар эмас. Шунингдек, клуб балансида Фоларин Балогун исмли АҚШ термаси ҳужумчиси мавжуд. У "Арсенал"га яқиндагина "Реймс"даги ижара муддатини ўтаб қайтди. Аммо у Лондонда қолмайди. Негаки, 22 ёшли футболчи ортиқ иккинчи рақамли ҳужумчи бўлиш ниятида эмас. Боз устига, Балогун учун кучли бешлик чемпионати клубларидан таклифлар бор. Шундай экан, "Арсенал" катта эҳтимол билан уни сотади. Балогун сотувидан тушган пул Хаверц трансферига сарфланади.
Хаверцнинг ўзига келадиган бўлсак, у шундай футболчики, тўпурарликдан кўра, креативликни афзал кўради. Шу сабаб майдонда унга кенг зоналар керак бўлади. Катта эҳтимол билан Хаверц Жезус билан яхши тандем ҳосил қила олади. Агарда "Арсенал" АПЛ ва ЕЧЛда чемпионлик учун интилишни хоҳласа, у ҳолда ҳужумни кучайтириши шарт. Хаверц бу йўлда фойдали харид бўлади. У ҳали ҳам 24 ёшда ва катта потенциалга эга. Ҳужумчи "Челси" сафида жами 139 та ўйин ўтказиб, 32 та гол ва 15 та ассистга муаллифлик қилган.
ИСМАТОВ Ж.
