"Эспаньол" ҳужумчиси Хоселу "Реал"га ижара асосида ўтади, бу ҳақда таниқли инсайдер Фабрицио Романо айтди.
Манбага кўра, "Реал Мадрид" 33 ёшли ҳужумчининг ижараси учун 500 минг евро тўлайди. Шартнома 1,5 миллион еврога сотиб олиш вариантини ўз ичига олади. Мадридликлар билан келишувга эришиш учун Хоселу маошини камайтирди.
Хоселу ўтган ёздан бери "Эспаньол"да тўп тепмоқда. Ўтган мавсумда у жамоа сафида 38 та ўйинда майдонга тушиб, 17 та гол урди ва 4 та голга ассистентлик қилди.
Шу йилнинг март ойида ҳужумчи Испания терма жамоасида дебют қилганди. Ўшандан бери у терма жамоа сафида учта ўйинда учта гол урди.