Ҳозир буни эшитиш ғалати ва кулгили туюлар, аммо Салоҳ 2017 йилнинг ёзида "Ливерпул"га олиб келинади ва кўпчилик бундай ҳайрон қолади. Негаки, одамлар унинг мерсисайд клубида муваффақият қозонишига ишонмаган эди. "Челси"да етарлича имконга эга бўлмаганидан кейин, мисрлик футболчи "Рома"га йўл олади. У ерда ўзини кўрсатгач, Салоҳ Клопп жамоасига жалб этилади. Салоҳ хариди, ўшанда қилинган тўрт трансфернинг бири эди. Муҳаммад Салоҳ шундан бери "Ливерпул"нинг тўпурари, барча даврлардаги энг яхши харидига айланди. Қуйида Салоҳ билан жамоага келган футболчилар ва уларнинг тақдирига назар соламиз.

Доминик Соланке

Салоҳ келганидан 9 кун ўтиб, "Челси"дан яна бир футболчи олиб келинди. Салонке Лондон клубидан 3 миллион фунтга харид қилинган эди. Ҳужумчи билдирилган ишончларни оқлай олмайди. Унинг жамоадаги илк голи мавсум сўнггида, "Брайтон"га қарши урилади. Шундай бўлсада, бу трансфердан нолиш керак эмас. Негаки, 2019 йилда "Ливерпуль" Соланкени 19 миллион фунт эвазига "Борнмут"га пуллайди. 24 ёшли юлдуз "олчалар" сафида ҳозирга қадар 30 та гол урган. Унинг ҳаракатлари билан "Борнмут" АПЛга чиққанди. У ўтган мавсумда 7 та гол ва 7 та ассистга муаллифлик қилди.

Эндрю Робертсон

Шотландия терма жамоаси аъзоси "Энфилд"га келган навбатдаги меҳмон бўлади. У 8 миллион фунт эвазига "Халл Сити"дан олиб келинган эди. Вақт шуни кўрсатдики, Робертсон сув текинга сотиб олинган экан. "Манчестер Сити" билан курашда у "Ливерпул"га катта ёрдам берди. Робертсон мерсисайдда мумкин бўлган барча совринларни қўлга киритган. Қанот ҳимоячилар ичида АПЛнинг энг кўзга кўрингани Эндрю Робертсондир.

Алекс Окслейд-Чеймбрлен

Гарчанд Алекс ҳам юқорида қайд этилган совринларга эга чиққан бўлса ҳам, у Робертсончалик жамоага ёрдам бера олмади. Инглиз ҳужумчиси "Арсенал"дан 35 миллион фунт эвазига сотиб олинади. Окслейд-Чеймбрлен ўз потенциалидан етарлича фойдалана олмади. Бунга эса унинг жароҳатлари сабаб бўлганди. Яқиндагина 29 ёшли футболчи эркин агент сифатида Клопп жамоасидан кетди. У эндиликда ўзига янги клуб қидириши керак.

ИСМАТОВ Ж.