Суперлига 13-туридан ўрин олган «Насаф» – ОКМК (2:0) учрашувидан сўнг мезбонлар бош мураббийи Рўзиқул Бердиев ўз фикрларини билдириб ўтди.

“ОКМК кучли жамоа. Уларга қарши баҳсда тартибли ҳимояланиш зарур. Рақибнинг олдинги чизиғига имконият бермаганимиз ғалабанинг омили бўлди. Бугун ишончли ҳисобда ғалаба қозондик, аммо киритилган голдан сўнг қарши ҳужумга ўтишда бироз қийналдик. Захирадан ўйинга қўшилганлар қарши ҳужумларда яхшироқ ҳаракат қилишини кутган эдим. Асосийси, кучли жамоани мағлуб этдик ва бундан хурсандман.

Ғайбуллаев бизнинг режада бор эди. Аммо, эрталаб бетоблиги боис таркибга қўшмасликка қарор қилдик. Станоевичнинг ҳолати сиз ва биз кутган даражада эмас. Шу сабаб таваккал қилмадик. Ярим йил футбол ўйнамаган инсон 10 кунда тайёр бўлиши қийин. Формасини тиклаб олса, албатта майдонга тушади.

Стандарт вазиятларда кўп ишлаймиз. Нафақат гол киритилган вазиятда, бошқа ҳолатларда ҳам яхши ҳаракат қилдик. Алиқуловнинг энг устун жиҳатларидан бири бош билан яхши ўйнай олишида. Ҳозирда 50 фоиз голлар стандартлардан сўнг киритилмоқда ва марказий ҳимоячининг олдинга чиқиши замонавий футболда бор.

Лиманинг шартномаси июлда тугайди. Режамизда бор, айни дамда юқори савиядаги ҳужумчи излаяпмиз, бироқ бу осон бўлмайди. Лекин биз излашда давом этяпмиз. Балки, шартномани узайтириш учун музокараларга киришармиз.

Хебайнинг жамоасидан кетиши мумкинлиги борасидаги хабар чиққанида у ҳақида маълумот йиғишга ҳаракат қилдик. Бироқ у жамоаси билан фаолиятини давом эттирадиган бўлди”, – деди Бердиев.