Англия Премьер-лигасидаги энг ёмон трансферлар қайси эканлиги маълум бўлди. Сунъий онг бунда бизга ёрдам беради. Махсус алгоритм асосида ишлайдиган дастур футболчиларни турлича категориялар асосида баҳолаб чиқди ва улар ичидан энг ёмон ўнтасини танлаб олди. Омадсиз харидлар сарфланган пул, ҳаракат қилинган давр, қолдирилган таассурот, шахсий талант ва кўрсатилган натижаларга қараб белгиланди. Қуйида уларнинг кимлигига эътибор берамиз.

"Арсенал"нинг рекорд хариди бўлган Николя Пепе 2019 йилда 72 миллион эвазига "Лилл"дан олиб келинади. У жами 116 та ўйинда 16 тагина голга муаллифлик қилди. Ўтган мавсум ҳужумчи учун "Ницца"да ижара асосида кечган эди.
Рўйхатдан иккита инглиз футболчиси ҳам жой олган: Энди Керолл ва Дэнни Дринкуотер. Хусусан Кероллнинг "Ливерпул"га кўчиши ўта омадсиз бўлганди. Ҳужумчи мерсисайдликлар сафида 44 та ўйин ўтказиб, 6 тагина гол урган холос. У "Вест Хэм"га йўл олиб, у ерда 7 йил фаолият юритади.
Иккинчи қаҳрамонимиз Дринкуотер эса "Челси" томонидан 35 миллион фунтга олиб келинганди. Афсуски, ярим ҳимоячи лондонликлар билан фақат 23 та ўйинда қатнашиб, қолган вақтини ижараларда ўтказди.
Ўнталик рўйхатдан "Челси"нинг бошқа трансферлари ҳам ўрин олган. Масалан, Фернандо Торрес. У 2011 йилда "Ливерпул"дан олиб келинади. Кейинги ном Винстон Богарде. У 4 йил "Челси" билан бўлиб, атиги 12 та ўйинда жамоага ёрдам берган.

Яқиндагина "Челси"дан кетган Тьемоэ Бакайоко ҳам омадсиз юришлардан бири. У бир пайтлар не умидлар билан 40 миллионга сотиб олинади.
"МЮ"нинг Поль Погба иши ҳам омадсиз харидлар ичида келади. Погба 4 йилдан кейин клубни эркин агент сифатида тарк этганди. Шунингдек, "қизил иблислар"нинг Алексис Санчес ва Хуан Верон харидлари ҳам рўйхатда келтирилган. Қолаверса, "Саутгемптон"нинг Али Диани сотиб олиши ҳам омадсизлар ичида зикр этилган. Шу билан кучли ўнлик тугайди.

ИСМАТОВ Ж.