"Ницца" ярим ҳимоячиси Кефрен Тюрам энди "Ливерпуль"нинг қизиқиш доирасида эмас, дея хабар беради The Athletic журналистлари. Бунга Доминик Собослаининг мерсисайдликлар сафига қўшилгани сабаб бўлди. Венгернинг трансфери якунлангач, "қизиллар" французни қўлга киритишдан воз кечишди.
Олдинроқ Мюнхеннинг "Бавария" клуби Тюрам хизматларидан бош тортганди. Ҳозирда футболчига асосий давогар "Ньюкасл" бўлиб турибди.
Ўтган мавсумда 22 ёшли ярим ҳимоячи Франция чемпионатининг 35та ўйинида иштирок этган. Кефрен иккита гол урди ва тўртта голли узатмани амалга оширди. Ярим ҳимоячининг "Ницца" билан шартномаси 2025 йилнинг ёзига қадар мўлжалланган.
