Футбол агенти Бруно Сатин Франция терма жамоаси ва "ПСЖ" ҳужумчиси Килиан Мбаппе фаолиятини қаерда давом эттириши мумкинлигини айтди. Унинг фикрича, 24 ёшли футболчини фақат учта клуб трансфер қила олади.
"Ўйлашимча, унинг трансфери 200 миллион еврога тушади. Бундай шартномани фақат "Реал", "Манчестер Сити" ва "Ньюкасл" кўтара олади. Ҳозирча Мадрид фаворит бўлиб турибди. "Ньюкасл" Килианни ўзига жалб эта олмайди ва "Манчестер Сити" ҳали курашга қўшилгани йўқ", - деди Сатин Lequipe билан суҳбатда.
Мбаппенинг "ПСЖ" билан шартномаси келаси йилнинг ўрталарига қадар амал қилади. Аввалроқ, ҳужумчи парижликлар билан шартномани узайтирмаслиги маълум бўлганди.
