"Арсенал" яқиндагина Деклан Райсни "Вест Хэм Юнайтед"дан сотиб олганини расман маълум қилган эди. Раҳбарият фикрича, у майдон марказида катта иш бажариши олади. Ҳақиқатдан ҳам, агарда Райснинг ўтган мавсумдаги статистикасига назар солсак, унинг нақадар фойдали футболчи экани маълум бўлади. Собиқ "болғачилар" сардори майдоннинг айни бир қисмида янги жамоадошларидан анча яхши саналади. 24 ёшли ярим ҳимоячи рақибдан тўпни олиб қўйиш борасида Мартин Эдегор, Жоржиньо Фрелло, Томас Парти ҳамда ҳозирда "Байер 04" сафига йўл олган Гранит Жакадан анча яхши кўрсаткичга эга.
Масалан, Райс ўтган мавсумда бу борада 63 та муваффақиятли ҳаракатни амалга оширган бўлиб, бу "Арсенал"нинг энг яхши "тозаловчиси" бўлган Томас Партиникидан 35 тага яхшироқдир. Шунингдек, Райс тўпни ҳимоядан ҳужумгача бўлган ҳудудда ўзи билан олиб юришда ҳам тенгсиз. Хусусан, у ўтган мавсумда 315 та ривожланувчи ҳужумлар асосига айланган тўпни ҳужумчиларга узатган. Бу эса Партиникидан 65 тага, Эдегорникидан 126 тага, Жоржиньоникидан, 232 тага, Жаканикидан эса 169 тага яхшироқдир. Англия терма жамоаси юлдузи АПЛда аниқ паст узатувчи энг яхши футболчилардан бири саналади. Бу борада унинг кўрсаткичи 88 фоизга тенг. "Арсенал"да Томас Парти ҳам 88 фоиз аниқликка эга. Райс қолган ярим ҳимоячилар, Эдегор (84 фоиз), Жоржиньо (87.6 фоиз) ва Жака (86.5 фоиз)дан яхшироқ аниқлик қайд этган.
Голлар борасида Деклан Райс унчалик ҳам мақтана олмайди. У ўтган мавсумда тўртта голга муаллифлик қилган бўлиб, бу борада фақат Эдегор (15 та) ва Жака (7 та) ундан яхшироқ натижага эга эди. Ассистлар беришда ҳам Эдегор ва Жака Райсдан яхши натижага эга (умумий 14 та).
105 миллион эвазига сотиб олинган футболчи ўтган мавсумда ЕКЛ финалини ютган эди. Унинг сардорлик қобилияти жамоа учун, охирги йилларда "Арсенал"га етишмаётган етакчилик ва характер хусусиятларини беради.
Сўнгги хабарларга кўра, Деклан Райс "Арсенал" билан АҚШдаги илк баҳсда майдонга тушиши кутилмоқда. Унинг трансфери Англия тарихидаги энг қимматига айланди. "Арсенал" ҳозирга қадар учта футболчи учун жами 210 миллион фунт сарфлаган эди.
ИСМАТОВ Ж.
