Суперлига 14-турида сафарда “Олимпик”ни мағлуб этган “Пахтакор” бош мураббийи Максим Шацких ғалаба, Ҳамралиев, трансфер ойнаси ва Файзуллаев ҳақида фикр билдирди.

“Бугун жисмонан чарчаб қолмаслик керак эди. Жамоанинг жисмоний ҳолатидан кўнглим тўқ. Шунчаки, тактик жиҳатдан ҳам яхшироқ ўйнашимизни истагандик. Буни уддаладик. Рақибдан анча кескинроқ ўйнадик ва ҳаққоний ғалабага эришдик”, - деди мураббий.

“Ҳамралиев билан гаплашиб олдик. У жуда яхши футболчи. Ақлли ва келажаги бор ўйинчи. Бу ёшда бундай хатолар қилиши табиий. Ҳаёлидаги негатив нарсаларни чиқариб ташлашини маслаҳат бердим”.

“Трансфер ойнасида ўзимиз истаган футболчиларни олдик дея оламан. Энди оладиган бўлсак, фақат маҳаллий футболчилардан оламиз. Легионерлар учун лимитимиз тугади”.

“Аббоснинг жамоадан кетиши кутилмаган жараён эмас. Буни кутгандик. У билан бунгача гаплашдик. Аммо, кетиши бу унинг танлови. Унга фақат омад тилайман”.

“Жамоанинг барча чизиғида рақобат бор дея оламан. Янги олиб келган дарвозабонимизнинг ҳаракатлари мени анча қувонтираяпти. Бу Қувватовга ҳам етарли мотивация. Умуман олганда, бошқа чизиқларда ҳам рақобат етарли”.