Марко Верраттининг собиқ агенти Донато ди Кампли «ПСЖ»ни қамоқхонага қиёслади, клубни футболчиларга таҳдид солишда айблади.
Табиийки, бу катта жамоа учун кескин айблов. Италиялик агентнинг айтишича, у Париж клуби соҳиби Носир ал Хелайфи туфайли етакчи мижозини йўқотган экан. Донато ди Кампли яна Марко Верратти вақтида «ПСЖ»дан «Барселона»га ўтишни хоҳлаганида, клуб италиялик ярим ҳимоячини ошкора таҳдид билан Парижда олиб қолишга эришганини баён қилди.
Биласиз, жорий ёз Парижда Килиан Мбаппе келажагига боғлиқ достоннинг янги серияси бошланди. Франция миллий жамоаси ҳужумчиси «ПСЖ» билан амалдаги шартномаси муддатини узайтирмоқчи эмас ва янги мавсум якунида клуб билан эркин агент мақомида хайрлашмоқчи. ОАВдаги хабарлар оқимига қарасак, «ПСЖ» раҳбарияти юлдуз футболчи позициясидан ғоят ғазабда ва голеадорни шу ёзда сотмоқчи. Акс ҳолда, парижликлар Килиан янги шартнома остига имзо чекиши учун қўшимча чора-тадбирларни қўллашга ҳам тайёрлар. Ушбу воқелик фонида Донато ди Камплининг Relevo нашрига берган ошкора интервьюси худди «олов устига мой қуйиш» каби бўлди. Италиялик агент Париж клуби футболчилар билан музокара жараёнида «шантаж» (тўғридан-тўғри таҳдид) усулига мурожаат қилишни яхши кўришини таъкидламоқда. «Футболчилар Парижда қамоққа тушишади, улар шунчаки, клуб хоҳлаганидек йўл тутишлари шарт. Яъни шахсий истаклари ўз аҳамиятини буткул йўқотади. Умуман, «ПСЖ»да ҳар қандай мунозара ёки муаммони «шантаж» ёки чўчитиш эвазига ҳал қилишни яхши ўзлаштиришган. Хусусан, Верратти билан «Барселона» вариантини танлаганимизда, бу амирга асло ёқмади. Носир ал Хелайфи ҳаттоки, менга ошкора таҳдид солди: «Агар «Барса» билан музокарани давом эттирсанг, Верратти сен билан алоқани узади. Қадамингни ўйлаб бос...». Кейин ҳаммаси у айтганидек бўлди. Ишончим комил, Марко «шантаж»дан қўрқиб кетган, тўғри, у буни тан олмайди, лекин ҳақиқат шу. Умуман, Верратти клуб сафига қўшилган куни қамоққа тушди. Биламан, биз «Барселона» вакиллари билан алоқа ўрнатганимиздан кейин «ПСЖ» мижозимни бир неча марта жиддий «огоҳлантирган». Парижликлар шунингдек, Неймарни сотиб олишлари ва унинг атрофида янги лойиҳа яратишларини айтишган. Ҳақиқат шуки, агар уларга қарши чиқсангиз, ҳаммаси шахсий ҳисоб-китобгача бориши ҳеч гап эмас. Эсимда, «Барселона»нинг собиқ президенти Хосеп Мария Бартомеу амирга охиригача қўнғироқ қилаверган, аммо у бирор марта жавоб бермаганди. Қисқаси, «ПСЖ» билан ёмон тажрибани бошдан ўтказдим, жуда ёмон. Парижда фақат пул ҳақида ўйлашади. «ПСЖ» - қалбсиз клуб. Жамоа футболчиларни қўйиб юбормаяпти, чунки ал Хелайфи ва унинг атрофидагилар наздида ҳаммасини сотиб олиш мумкин, пул билан дунёни забт этиш имкони бор. Аммо бу иложсиз эканлигини ҳамма аллақачон кўриб бўлди «ПСЖ» мисолида...», - деди ди Кампли.
Қўшимча қилиш ўринли, Верратти 2017 йили чиндан ҳам, ҳамюрти билан ҳамкорликни тўхтатиб, марҳум Мино Райола мижозига айланди, аммо у бу қарорига ҳеч қачон қандайдир изоҳ берган эмас. Эҳтимол, барчаси ди Кампли айтганидек ривожлангандир...
Д.АЛИМОВ тайёрлади
