ЖЧ саралаш босқич доирасидаги Эрон терма жамоасига қарши учрашувда Ўзбекистон терма жамоаси ўта муҳим бўлган ғалабани қўлга киритди.

Учрашувнинг 7-дақиқасида Қосим Деҳлавий Ашкан Дежога томонидан етказиб берилган тўпни боши билан Нестеров дарвозасига йўллади. Бироқ тўп бироз юқоридан ўтиб кетди.

Учрашувнинг 13-дақиқасига келиб Эрон футболчилари гол киритишганди. Бироқ бу вазиятда тўпнинг йўлини бевосита дарвозабондан тўсиб қолган рақиб футболчиси ўйиндан ташқари ҳолатда қолганини кўрди ва қоида бўйича офсайдни қайд этди.

17-19 дақиқаларга келиб энди бизнинг футболчилар ҳам олдинга бора бошлашди. Кетма-кет иккита бурчак зарбалари хавфли кўриниш олган бўлсада, самара бермади. Кейинги ҳолатларда ҳам жамоамиз бироз устунликни қўлга ола бошлади. Учрашувнинг ўта муҳимлиги натижасида 20 дақиқадан сўнг футболчилар майдонда футболдан ташқари даҳанаки жангга ҳам киришиб кетишди. Сервер Жепаровга нисбатан ишлатилган қўполликдан сўнг футболчимиз ҳали туриб улгурмаган маҳалда Ашкан Дежога унга қарата тўпни тепиб юборди. Бу қилиғини кўриб турган вакилларимиз унга ташланиб кетишди. Натижада бу вазият учун Азизбек Ҳайдаров ва Дежогаларга сариқ карточка кўрсатилди.

31-дақиқада терма жамоамизда яхши имконият юзаша келди. Рақиб ҳимоясидаги пала-партишлик натижасида вакилларимиз кетма-кет тўрт марта зарба бериш имкониятига эга бўлишди. Лекин зарбалар ҳар сафар ўша пала-партиш ҳимояга тегиб қайтаверди. Сўнггисида тўпни эгаллаб олган Фозил Мусаев бир рақибни алдаб ўтди ва дарвоза томон зарба берди. Бироқ зарба кучсиз чиққани боис Саид Раҳматий уни эгаллаб олди.

Биринчи бўлимнинг қолган дақиқаларида ўта хавфли вазиятлар содир этилмади. Бошида бироз ҳаяжонга берилган вакилларимиз бўлим ўрталарига келиб ўзига келиб олишди ва иложи борича тўпни назорат қилишга ҳаракат қилди.

Иккинчи бўлим бошиданоқ олдинга ташланган эронликлар 47-дақиқада ҳисобни очишлари мумкин эди. Бўлим бошида майдонга тушган Карим Ансорифарднинг зарбаси хавфли, бироқ ноаниқ чиқди.
50-дақиқада энди вакилларимизда стандарт вазият юзага келди. Санжар Турсуновга нисбатан ишлатилган қўполликдан кейин Сервер Жепаров жарима зарбасини амалга оширди. Унинг зарбасидан кейин дарвозабон тўпни қўлидан чиқариб юборганди, бироқ тўпга яна Раҳматийнинг ўзи биринчи бўлиб етиб келиб тўпни эгаллаб олди. 55-дақиқада энди Азиз Ҳайдаров узоқ масофадан зарба бериб кўрди. Бироқ тўп анча ноаниқ кўриниш олди. 67-дақиқада ҳам унинг айнан шунга ўхшаш зарбаси ноаниқ кетди.

72-дақиқага келиб эса навбатдаги стандарт вазиятдан кейин терма жамоамиз ҳисобда олдинга чиқиб олишди. Сервер Жепаровнинг жарима майдончасига етказиб берган тўпини Улуғбек Бақоев рақиб дарвозасига киритди.

Ушбу гол ўйин охирига қадар ўзгармай қолди ва жамоамиз ўта муҳим ўйинда ғалаба қозониб гуруҳда биринчи ўринга кўтарилиб олди.

ЖЧ-2014. Саралаш. Осиё минтақаси 4-босқич
ЭРОН - ЎЗБЕКИСТОН 0:1 (0:0)
Гол: Улуғбек Бақоев (72)
ЎЗБЕКИСТОН: 12. Игнатий Нестеров, 23. Акмал Шораҳмедов, 4. Артём Филипосян, 6. Ислом Тўхтахўжаев, 14. Виталий Денисов, 17. Санжар Турсунов, 18. Фозил Мусаев, 7. Азизбек Ҳайдаров, 22. Шоҳрух Гадоев (13. Олег Зотеев, 65), 8. Сервер Жепаров, 10. Улуғбек Бақоев (15. Александр Гейнрих, 82).
ЭРОН: 1. Сайид Раҳматий, 2. Ҳусрав Ҳайдарий, 4. Сайид Ҳуссайний, 6. Жавод Некунам, 7. Муҳаммад Нурий (18. Пажмон Нурий, 66), 9. Ризо Гучаннежҳод, 14. Андраник Теймурьян (11. Алиризо Аббосфад, 80), 15. Пежман Мунтазарий, 16. Ашқан Дежога, 19. Милод Нурий, 21. Меҳрдод Пўлатий, 23. Муҳаммад Ризо Халатборий (10. Карим Ансорифад).

Огоҳлантиришлар: Ашкон Дежога (24), Муҳаммад Нурий (50) - Азизбек Ҳайдаров (24), Сервер Жепаров (52), Акмал Шораҳмедов (56).