"Манчестер Юнайтед", ҳали мавсумнинг аввали бўлишига қарамасдан, жароҳатлар эпидемиясига дуч келди. Бу эса, клуб раҳбариятини трансферлар ойнаси ёпилишига бир кун қолганида яна қўшимча харидларга мажбур қилиши мумкин.
"Қизил иблислар" якашанба куни "Арсенал" майдонига сафар қилади. Аммо Эрик тен Хаг жамоаси ўзининг идеал таркибидан фойдалана олмаслиги мумкин. Негаки, асосий таркиб юлдузлари майдонга туша олмайди. Яқиндагина, уларнинг орасига Рафаэль Варан ҳам қўшилди. Натижада "МЮ" ҳимоя учун яна бир трансфер қилишига тўғри келади.

Манкунианликлар бу борада Франция чемпионатига мурожаат қилади. Улар "Ницца"дан Жан-Клер Тодибони сотиб олишни мақсад қилган. Агарда бу режа иш бермаса, "Арсенал"га қарши Виктор Линделёфдан фойдаланишга тўғри келади. Ҳаммасидан ҳам, мудофаада Эрик тен Хагни қанот футболчилари Люк Шоу ҳамда Тирелл Маласияларнинг йўқлиги қийнайди. Шу сабабдан қанот учун ҳам янги кучлар қидиришга тўғри келмоқда. "МЮ" бу борада "Челси"га таклиф билан чиқиб, Марк Кукурельяни сўради. Испаниялик футболчи Ғарбий Лондонга бундан атиги бир йил илгари, "Брайтон"дан 63 миллион фунт эвазига келганди.

Ҳимоядаги икки янги футболчи билан иш битса, қани энди? Аммо тен Хаг олдида ярим ҳимоядаги муаммолар ҳам бор. Уларни ёпиш учун Мейсон Маунт ўрнини тўлдириш лозим. Тен Хаг бу борада ўзининг собиқ шогирди Пьер-Эмил Хёйбьергни таклиф этмоқчи. Бу жуфтлик ўтмишда "Бавария" сафларида бирга ишлаган. Ҳужум чизиғини Бруну Фернандеш 10 рақамли футболчи сифатида бошқаради. Қанотларда Рэшфорд ва Антони бўлиши кўзда тутилган. Марказий ҳужумчи сифатида эса Антони Марсьяль танланади. Янги харид бўлган Расмус Хёйлунн ҳам бу баҳсга қадар сафга қайтиши айтилган. Аммо у асосий таркибда майдонга туша олмайди.
Эслатиб ўтамиз, "Арсенал" ва "МЮ" ўртасидаги баҳс 3 сентябрь, якшанба куни, Тошкент вақти билан 20:30 да старт олади.

ИСМАТОВ Ж.