Осиё футбол конфедерацияси (ОФК) томонидан Чемпионлар лигаси гуруҳ босқичи 2-турининг энг яхши голи муаллифи бўлишга даъвогар футболчилар рўйхати эълон қилинди.

Биз учун қувончлиси, ушбу рўйхатдан "Навбаҳор"нинг тажрибали ярим ҳимоячиси Жамшид Искандеров томонидан “Мумбай Сити” (Ҳиндистон) дарвозасига урилган гол ҳам ўрин олган.

Хабарингиз бор, ўша ўйинда “лочинлар” йирик – 3:0 ҳисобида ғалаба қозонишган, Искандеров учрашувнинг 52-дақиқасида 25 метрлар чамаси узоқликдан чап оёғида дарвозага кучли ва аниқ зарба йўллаб, ҳисобни очган ҳамда “Навбаҳор”нинг Осиё Чемпионлар Лигаси  (ОЧЛ)даги илк голи муаллифига айланганди. 

ОЧЛ 2-турининг энг яхши голи муаллифи бўлишга даъвогарлар қаторида Мусса Марега (“Шаржа” ФК), Али Жасим (“Эйр Форс”), Неймар (“Ал –Ҳилол”), Талиска (“Ал-Наср”), Рунграт Пумичантук (“Бангкок Юнайтед”), Паул-Хосе М`Поку (“Инчеон Юнайтед”), Азиз Беҳич (“Мельбурн Сити”), Кенто Тачибанада (“Кавасаки”) ва Ориф Аиман (“Жоҳор Дарул”)лар ҳам бор.

Энг яхши голга овоз бериш учун ушбу саҳифага ўтинг.