«Ювентус» «Манчестер Сити» ярим ҳимоячиси Калвин Филлипсга қизиқиш билдирмоқда.

27 ёшли футболчи «шаҳарликлар» сафида камдан-кам майдонга тушмоқда, шу боис, аввал хабар қилинганидек, клуб ижара вариантларини кўриб чиқади.

The Telegraph нашри хабарига кўра, англиялик ярим ҳимоячига янги даъвогар Италиянинг «Ювентус» клуби бўлади, у мавсум охиригача ижарага олиш имкониятини кўриб чиқмоқда. «Кекса синёра» футболчи учун «Ньюкасл» билан рақобатлашишига тўғри келади.

Калвин Филлипс бу мавсумда «Манчестер Сити»нинг атиги бешта ўйинида майдонга тушди ва фақат битта баҳсни асосий таркибда бошлади. 

Transfermarkt экспертлари англиялик футболчининг нархини 28 миллион еврога баҳоламоқда.