Мадриднинг "Реал" клуби Кепа Аррисабалагани ижара муддати тугаганидан кейин “Челси”дан сотиб олишни режалаштирмоқда, дея хабар бермоқда The Sun нашри.
Манба берган хабарга кўра, "Қироллик клуби" 29 ёшли испаниялик дарвозабон учун 20 миллион евродан кўп бўлмаган пул таклиф қилишга тайёр. Мадридликлар раҳбарлари шартномага ўз дарвозабони Андрей Лунинни киритиш вариантини кўриб чиқмоқда.
Жорий мавсумда Кепа "Реал" сафида барча мусобақаларда 11та ўйин ўтказиб, 9та гол ўтказиб юборди. Дарвозабоннинг "Челси" билан шартномаси 2025 йилнинг июнь ойи охиригача амал қилади. Transfermarkt интернет порталига кўра футболчининг тахминий нархи 18 миллион еврони ташкил қилади.
Эслатиб ўтамиз, Кепа тиззасидан олган жароҳати туфайли узоқ муддат майдонга туша олмаётган Тибо Куртуанинг ўрнига ижарага олинганди.
