Ўзбекистон терма жамоаси ЖЧ-2026 саралаши доирасида ташриф буюрадиган илк мамлакат - Туркманистонга кириш учун ҳалигача коронавирусга ПЦР тести топширилади.

Ҳозирда дунёнинг бошқа мамлакатларида ортиқ қўлланилмаётган бу амалиёт - Туркманистонда ҳалигача сақланиб қолган. Яъни тест натижаси ижобий чиққан делегация вакили ёки футболчи дарҳол изоляция қилинади.

Тест натижасининг қандай чиқиши тўлиқлигича мезбонларнинг қўлида. Тасаввур қилинг, Ашхобод аэропортида етакчи футболчиларимизда "кутилмаганда коронавирус аниқланган" тақдирда, бу тестнинг нотўғри эканлигини ким, қандай исботлаб бера олади?

COVID-19 авж олган 2019-2020 йилларда, баъзи мезбон давлатлар ушбу айёрликдан фойдаланган бир нечта ҳолатлар кузатилган эди. Бу вазиятда, ташқи дунёдан узилган ҳолда, ўз қоидалари асосида яшовчи мамлакат расмийларининг инсофига умид қилишдан бошқа иложимиз йўқ.