«Реал Мадрид» бош мураббийи Карло Анчелотти деярли ҳар бир матбуот анжуманида келажаги ҳақида саволлар олмоқда.
Бунинг ажабланарли жойи йўқ, чунки унинг амалдаги шартномаси мавсум охиригача амал қилади. Чемпионлар лигаси доирасидаги «Наполи»га қарши ўйин олдидан журналистлар билан суҳбатда Анчелоттидан яна ўз вазиятига изоҳ беришини сўрашди.
«Менинг келажагим? Мен бу ҳақида гапиришни хоҳламайман», - дея Анчелоттининг матбуот анжуманидаги сўзларини келтиради Madrid Xtra.
«Реал» «Наполи»га қарши ўйинни 29 ноябрь, чоршанба куни ўтказади. Карло Анчелотти шогирдлари гуруҳда биринчи ўринни қўлга киритиш учун фақат битта очко олса кифоя.
